दुनियाँले नटेकेको मेरो शहर तिमीलाई
कसैसँग नसाटेको मेरो रहर तिमीलाई ।

डाँडा, पाखा, फूल चौर सङ्गीतको धूनसँगै
पूर्णिमामा फूल्ने जून, तारा लहर तिमीलाई ।

सारङ्गीमा रेटिएर युगयुग बाँच्ने प्रीति
हाम्रो आँसु हाँसो बग्ने प्रेम नहर तिमीलाई ।

आँखाभरि सजाएका, मुटुभरि फूलाएका
तिम्रै लागि लेखिएका गजल बहर तिमीलाई ।

खै के दिउँ प्रेम चिनो मात्र रित्तो मान्छे हुँ म
फूलैफूल बनी फूल्ने पैलो पहर तिमीलाई ।

- सीमा आभाष